Gen 12 | NdeIBE | STEP | UJehova wathi ku-Abhrama, “Suka elizweni lakini, lebantwini bakini lasendlini kayihlo uye elizweni engizakutshengisa lona.

Genesis 12

Ukubizwa kuka-Abhrama

1 UJehova wathi ku-Abhrama, “Suka elizweni lakini, lebantwini bakini lasendlini kayihlo uye elizweni engizakutshengisa lona.

2 “Ngizakwenza ube yisizwe esikhulu njalo ngizakubusisa. Ngizakwenza ibizo lakho libe likhulu, njalo uzakuba yisibusiso.

3 Ngizababusisa labo abakubusisayo, njalo lowo okuqalekisayo ngizamqalekisa; ngakho bonke abantu bomhlaba bazabusiswa ngawe.”

4 Ngakho u-Abhrama wasuka, njengokutshelwa kwakhe nguJehova; njalo uLothi wahamba laye. U-Abhrama wayeleminyaka engamatshumi ayisikhombisa lanhlanu ekusukeni kwakhe eHarani. 5 Wathatha umkakhe uSarayi, lomntanomfowabo uLothi, lempahla yabo yonke ababeyizuzile kanye labantu ababebatholile eHarani, baqonda elizweni laseKhenani, bayafika khona.

6 U-Abhrama wahamba walidabula ilizwe waze wafika endaweni yesihlahla esikhulu saseMore eShekemu. Ngalesosikhathi amaKhenani ayephakathi kwelizwe. 7 UJehova wabonakala ku-Abhrama wathi, “Lelilizwe ngizalinika isizukulwane sakho.” Yikho wasesakha i-alithare khonapho elakhela uJehova owayebonakele kuye.

8 Esuka lapho waqonda ezintabeni empumalanga kweBhetheli wamisa ithente lakhe, iBhetheli isentshonalanga le-Ayi isempumalanga. Khonapho wakhela uJehova ialithare walidumisa ibizo likaJehova. 9 UAbhrama wasuka waqhubeka eqonda eNegebi.

U-Abhrama eseGibhithe

10 Kwaba khona indlala elizweni, yikho u-Abhrama waya eGibhithe ukuyahlala khona okwesikhathi esithile ngoba indlala yayibhahile. 11 Kwathi esebanga ukungena eGibhithe wathi kumkakhe uSarayi, “Ngiyazi ukuthi ungumfazi omuhle kakhulu.

12 AmaGibhithe azakuthi ekubona athi, ‘Lo ngumkakhe.’ Lapho-ke bazangibulala wena bakuyekele uphile. 13 Ubokuthi ungudadewethu, ukuze ngiphathwe kuhle ukuze kukulungele lempilo yami isindiswe ngenxa yakho.”

14 Kwathi u-Abhrama efika eGibhithe, amaGibhithe abona umkakhe ukuthi wayengumfazi omuhle kakhulu. 15 Izikhulu zikaFaro sezimbonile zamncoma kakhulu kuFaro, uSarayi wasengeniswa esigodlweni sakhe. 16 Wamphatha kuhle u-Abhrama ngenxa kaSarayi, yikho u-Abhrama wazuza izimvu lezinkomo, obabhemi abaduna labasikazi, izinceku zesilisa lezesifazana lamakamela.

17 Kodwa uJehova wehlisela uFaro lendlu yakhe izifo ezimbi ngenxa kaSarayi umka-Abhrama. 18 Yikho uFaro wabiza u-Abhrama wathi, “Wenzeni kimi? Kungani ungangitshelanga ukuthi ungumkakho na? 19 Watsholoni ukuthi ungudadewenu, ngacina sengizithathele mina waba ngowami? Manje, nangu umkakho. Mthathe uhambe!” 20 UFaro waselaya ukuthi u-Abhrama lamadoda ayelawo basuswe elizweni, kanye lomkakhe lakho konke ayelakho.